புணர்ச்சி விதிகள்

கல்லுப்பிட்ட
இரத்தச் சிவப்பிற்கு மயங்கி
பால்யத்தில் நான்
வெற்றிலைக்குக்
கை நீட்டியபோது
மாடு முட்டுமென்றாள்
அன்று விட்டவன்தான்
பின்னர்
பத்தாம் வகுப்பில்தான்
திரும்பிப் பார்த்தேன்

முதல் முறையாய்
அக்கா மகளுடன்
வீடு வந்திருந்தவள்
திரும்பிப் போனதும்
புகாரைத் தொடர்ந்தாள்
அவ செரியில்லடா...
வெங்காயங்கூட
வெட்டத் தெரியல...
புள்ளையப் போட்டு
அடிச்சுக்கிட்டே இருக்கறா...

வேறு வழியின்றி நான்
கைபேசியின்
சமீபத்திய புகைப்படம்
ஒன்றை அழித்தேன்.

வரலாறு

இப்போது கடந்தோமே பாலம்
காற்று தாளத்துடன்
விட்டு விட்டுக்
காதில் அறைந்ததே
மத்திய அமைச்சர்
திறந்து வைக்கையில்
ரிப்பன் வெட்டிய
அடுத்த நொடியில்
என் தாத்தாதான்
முதல் ஆளாக...
ஒற்றை ஆளாக...
டிவிஎஸ் பிஃப்டியில்
அதைக் கடந்தார்.

தங்கைகளின் வீட்டிற்குப் போவதில்லை

பக்கத்து வீடுதான்
பால்ய சினேகிதம்தான்
அண்ணனுக்குத் தண்ணி குடு
அண்ணங்கிட்ட முறுக்க வையி
அண்ணனுக்கு டீயப் போடு
அண்ணங்கிட்டக் கேட்டுப் படி.